سياسة الخصوصية
تطبيق هدهد التعليمي · آخر تحديث: ٢٧ سبتمبر ٢٠٢٦
هذا التطبيق يستخدمه أطفال، فالسياسة دي مكتوبة عشان وليّ الأمر يقراها ويفهم بالظبط إيه اللي بنعرفه عن ابنه، ومين بيشوفه، وإزاي يشيله كله.
١. مين المسؤول عن البيانات
المسؤول عن التطبيق وبياناته هو مصطفى محمد محمد ثابت، بصفته الشخصية (مش شركة)، القاهرة، مصر. للتواصل في أي سؤال عن الخصوصية: support@hoopoe.school.
٢. التطبيق ده لمين
التطبيق موجّه لتلاميذ المرحلة من الصف الثالث الابتدائي إلى الصف الثالث الإعدادي (حوالي ٨ إلى ١٥ سنة)، ومن الوارد إننا نضيف صفوفًا أخرى بعدين. يعني جزء كبير من مستخدمينا أقل من ١٣ سنة، وده اللي شكّل كل قرار في السياسة دي.
الطفل الصغير المفروض يكون حسابه اتعمل بمعرفة وليّ أمره، ووليّ الأمر يقدر في أي وقت يشوف تقدّمه، يغيّر كلمة مروره، أو يحذف حسابه بالكامل من داخل التطبيق.
٣. البيانات اللي بنجمعها فعلاً
| البيان | ليه |
|---|---|
| الاسم | عشان الشاشة تنادي الطفل باسمه، ووليّ الأمر والمعلّم يعرفوه في القائمة. |
| بريد إلكتروني أو اسم مستخدم | لتسجيل الدخول. الطفل اللي وليّ أمره أنشأ حسابه ملوش بريد أصلاً — اسم مستخدم وبس. |
| كلمة المرور | مخزّنة مشفّرة باتجاه واحد؛ إحنا نفسنا مش قادرين نقراها. |
| الصف الدراسي والمسار | عشان نعرض المنهج الصح. |
| إجابات الأسئلة، والأخطاء، والنقاط، وتواريخ النشاط | ده جوهر التطبيق: من غيره مفيش مسار ولا مراجعة أخطاء ولا تقرير لوليّ الأمر. |
| الارتباط بوليّ الأمر، والعضوية في مجموعة معلّم | عشان نعرف مين مسموح له يشوف تقدّم الطفل. |
| جلسات الدخول | مخزّنة كبصمة مشفّرة فقط، عشان الطفل ما يتطلعش من التطبيق كل ساعة. |
| سجلات تشغيل تقنية | لتشخيص الأعطال. |
٤. حاجات إحنا مش بنجمعها
- مفيش موقع جغرافي.
- مفيش جهات اتصال ولا صور ولا ميكروفون ولا كاميرا.
- مفيش إعلانات من أي نوع، ومفيش أدوات تتبّع إعلاني.
- مفيش بيع ولا مشاركة لبيانات أي طفل لأغراض تسويقية، لا الآن ولا مستقبلاً.
- مفيش تسجيل دخول عبر شبكات التواصل.
٥. مين بيشوف بيانات الطفل
- الطفل نفسه.
- وليّ الأمر المرتبط بحسابه — يشوف تقدّمه وأخطاءه ونشاطه.
- المعلّم اللي الطفل انضم لمجموعته بكود — يشوف نفس صورة التقدّم. الطفل يقدر يخرج من المجموعة في أي وقت، وساعتها المعلّم ما يعودش يشوفه.
- إدارة المنصة، في أضيق حدود وللتشغيل والدعم الفني فقط.
٦. أطراف خارجية
بعض الأسئلة إجابتها مكتوبة بخط الطفل (سؤال مقالي). عشان نصحّحها، بنرسل نص الإجابة نفسه إلى مزوّد خدمة ذكاء اصطناعي خارجي (Google، خدمة Gemini) مع نص السؤال ونموذج الإجابة. مش بنرسل اسم الطفل ولا بريده ولا أي شيء يعرّفه شخصيًا مع الإجابة.
بنستخدم كمان مزوّد استضافة لتشغيل الخادم وقاعدة البيانات: Hostinger، والخادم موجود في باريس، فرنسا. يعني بيانات الحسابات بتتخزن على خادم برّه مصر.
٧. مدة الاحتفاظ
بنحتفظ ببيانات الحساب طول ما الحساب موجود — لأن تقدّم الطفل من سنة لسنة هو المنتج نفسه. لما الحساب يتحذف، بيتشال معاه كل اللي فوق. سجلات التشغيل التقنية بتتشال دوريًا.
٨. حقوق الأسرة
- الاطّلاع: وليّ الأمر بيشوف تقدّم ابنه بالكامل من داخل التطبيق.
- التصحيح: الاسم والصف قابلين للتعديل، وكلمة المرور يقدر وليّ الأمر يعيّنها من شاشة الابن.
- الحذف: من داخل التطبيق — «حسابي» ← «حذف الحساب»، أو وليّ الأمر يحذف حساب ابنه من شاشة الابن. ومن غير التطبيق: صفحة طلب حذف الحساب.
- سحب الموافقة: بحذف الحساب. مفيش استخدام تاني للبيانات بعد الحذف.
٩. الأمان
كلمات المرور مخزّنة مشفّرة باتجاه واحد، وجلسات الدخول مخزّنة كبصمة مشفّرة فقط، والاتصال بالخادم مشفّر. مفيش نظام بيقدر يوعد بأمان كامل، بس دي الإجراءات القائمة فعلاً.
١٠. التعديلات على السياسة
لو غيّرنا حاجة جوهرية — بيان جديد بنجمعه، أو طرف خارجي جديد — هنحدّث الصفحة دي ونغيّر تاريخ آخر تحديث، وهنعلن ده داخل التطبيق.
١١. التواصل
أي سؤال أو شكوى بخصوص خصوصية طفلك: support@hoopoe.school.